Bizkaia Talentek eta “la Caixa” Gizarte Ekintzak Talentia Challenge Programa garatzeko lankidetza-hitzarmena sinatu dute
- Hitzarmenari esker, ekimeneko parte-hartzaileen jarduerak eta nazioarteko bisitaldietarako joan-etorriak areagotu ahal izango dira
Bizkaia Talentek bultzatutako Talentia Challenge Erronken Programaren lehenengo edizioa amaitzear dagoen arren, albiste onak sortzen jarraitzen du. Hain zuzen ere, “la Caixa” Gizarte Ekintzak programako laguntzaile moduan atxikitzeko hartutako erabakia izan da azkena.
Talentia Challenge ekimen berritzailea da, eta ondo baino hobeto prestatutako profesionalak erakartzeko, berton geratzeko eta inplikatzeko prozesuak zein baldintzak sustatzea dauka helburu. Hartara, euskal erakundeen berrikuntza eta jakintza aurreratua suspertu ahal izango dira.
Proiektu hori Talentia Programa ezagun eta beteranoan zein Bizkaiko Profesionaltasunerako Trebetasunen Programan dago oinarrituta. Bertatik, gainera, Euskadiko hiru unibertsitateak kontuan hartuta (EHU, Deusto eta Mondragon) Bizkaian ahalmen handiena duten graduko 1.000tik gora ikasle igaro dira.
Lehenengo edizio honetan, euskal erakunde ospetsuek parte hartu dute, eta euren erronkak aurkeztu dituzte; esate baterako, IDOM, ARTECHE, Bizkaiko Parke Zientifiko eta Teknologikoa, LANTEGI BATUAK eta Bizkaiko Foru Aldundia bera, besteak beste.
HITZARMENAREN SINADURA
Bizkaia Talenteko zuzendari gerenteak, Ivan Jimenezek, eta CaixaBank-eko erakundeen zuzendaria Bizkaian, Elena Abando, lankidetza-hitzarmena sinatu dute, “la Caixa” Gizarte Ekintzari esker Talentia Challenge Programa aitzindaria are gehiago sustatzeko.
Hitzarmen horrek programako bertako jarduerak egitea dauka helburua, baina, batez ere, nazioarteko bisitaldiak bultzatzea; Finlandiako edo Cambridgeko hiri handietara egin berri direnak bezalakoak, adibidez.
“Lankidetza hau sinatzea aukera aparta da, programa bera bultzatuko delako eta jarduerak zein nazioarteko bisitaldiak egin ahal izango direlako, Talentia Challenge Programaren lehenengo edizioko parte-hartzaileei prestakuntza eta esperientzia hobea eskaintzeko”, adierazi du Bizkaia Talenteko zuzendari gerenteak.
Bestetik, Abandok azaldu duenez, “la Caixa” Gizarte Ekintzan, gazteen enpleguaren sorrera zein ekintzailetza sustatu nahi ditugu, eta Talentia Challenge gure lehentasunekin bat datorren programa dela uste dugu”.
