Bilbo, Europan aire garbiena duen hiria
2024/12/09
Bilbao Ría 2000
- Euskal hiriburua airearen kalitatearen Europako rankingaren lehen postuan dago, bere eraldaketa iraunkorrari esker.
Bilbo aire garbiena duen hiria da Europan, Erresuma Batuko Auto Trader enpresa ospetsuak egindako azterlan baten arabera, non mundu osoko 393 hiriren kutsadura atmosferikoa aztertu duen (2021eko otsailetik 2024ko abuztura).
Bizkaiko hiriburuaren ondoren, Amsterdam, bertako txirrindularitza-kulturagatik eta emisio urriko eremua izateagatik ezaguna, eta Edinburgo (Erresuma Batua) daude. Horien atzetik, honako hiri hauek osatzen dute sailkapeneko aurreneko 10 postuen zerrenda: Manchester (Ingalaterra), Bergen eta Oslo (Norvegia), Londres (Erresuma Batua), Göteborg (Suedia), Glasgow (Eskozia) eta Kolonia (Alemania). Gainera, Bilbo Ipar Amerikako hiri guztiei nagusitzen zaie airearen kalitateari dagokionez, Edmontoni (Kanada) salbu.
Azterlana egiteko, hainbat kutsatzaileren aztarna behatu da, hala nola sufre dioxidoarena (SO2), nitrogeno dioxidoarena (NO2), PM2.5 eta PM10 partikulena, ozonoarena (O3) eta karbono monoxidoarena (CO), airearen kalitate-indizea sortzeko erabili direnenak, hain zuzen ere.
Hiriaren eraldaketa
Txostenak Bilbok azken hamarkadetan bizi izan duen eraldaketa ikusgarria nabarmentzen du. Kutsadura-maila handiak zituen hiri industriala izatetik jasangarritasunaren eta bizi-kalitatearen mundu-mailako eredu izatera igaro da. Aldaketa XX. mendearen amaieran hasi zen, eta, beste mugarri batzuen artean, Guggenheim Museoaren inaugurazioak, 1997an, bultzada handia eman zion, biziberritze kultural eta urbanoa ekarri baitzuen. Garraio publikoaren modernizazioak eta itsasadarraren berrikuntzak garapen iraunkorreko erreferente gisa finkatu dute Bilbo.
Testuinguru horretan, Bilbo eskualde- eta toki-mailan NBEren Garapen Iraunkorreko Helburuak Garatzeko eta Ezartzeko Idazkaritzaren munduko egoitza izan dadin hautatu izanak ingurumen- eta gizarte-ongizatearekin duen konpromisoa sendotu du. Aitorpen horrek, beste ekimen batzuekin batera, emisio urriko eremuen sorkuntza, kasu, iraunkortasun, berrikuntza eta bizi-kalitatearen adibide bihurtu dute hiria.
